'Sbɛ 'ɛ taan ‑nɛ
('Dʋ 73‑89)
'Diwɔnyniʋn 'a dɛ 'ʋn 'wlʋa
73
Asafʋ 'a tɔ' "kpei naadɩ‑.
Kɩɩn, Kea nmɔ 'diwɔn 'de Israɛ ‑pee,
'de nyʋ ‑ʋʋa pɛe o nɩa 'pepe ‑pee.
2 'Kaa 'mɔ ɛ, 'ma bʋ muɛ ‑gbli" 'a 'de‑,
ɛ siɛ dɛ ‑saan" ka ‑mɛ 'ɩn ‑srɛɛn i 'de‑.
3 Dɛ ‑nʋɛ, ‑cnuu"‑ nyʋ 'a dɛ 'ʋn 'wlʋa a ‑cri' 'ma pɛe 'mɛ.
4 Dɛjrɛ' 'ɛ tɛɛn ʋʋpʋ‑ wɔn i mamaʋ 'sʋ ʋʋa jea 'mɛ.
Ʋʋa' nyiɔjɔ ‑wee'‑ nɩɛ ‑pɔunpɔun.
5 Nyʋ ‑wee'‑ 'a 'kle ‑tɩ'a blʋpʋ‑ "i.
Nai" ‑tɩ ‑ɛɛ ‑jea nyʋ ‑wee'‑ ɛ, ɛɛ' bla ʋʋpʋ‑ "i.
6 Ɛmɛ ‑tɩ ‑cɛi" 'bɛa' nɩ ʋʋa' ‑pɛe ʋʋa po plun‑,
‑wɛe ‑cnun" un‑ nɩ ʋʋa' 'ʋnpaadɛ ʋʋ nɩ 'e 'di.
7 Ʋʋ nmɔɔ 'de nyʋ "jri 'dei.
Tɔ' saʋn ‑nɩa ʋʋ pɛe o 'pɛɛn "kpae' 'de ‑sɔn 'ʋn.
8 Ʋʋa wlaa nyʋ, nyʋ ‑kwlʋ kpʋn wlu 'a 'sʋ ‑nɩ ʋʋpʋ‑ 'wɔn.
Nyʋ "jru 'ja ‑tɩ 'a 'sʋ mɩ ʋʋa 'tmʋ
9 Ʋʋa toɛ jaʋn ‑cɛɛn'‑ ‑nɛ wɔin",
ʋʋa' mɩɩɔ ɔ tba dɛ ‑wee'‑ ‑tɩ' ‑pʋn" 'de 'blʋa "kpei.
10 Dɛɛ ‑tɩ ‑wɛenyʋ ‑wee'‑ "bia 'de ʋʋpʋ‑ o ɛmɛ ‑nɩ,
nyɔ ɔ 'na ʋʋa' wlu 'mɛ ka nyɔ ɔ 'na "ni ɛ,
11 ‑Wɛenyʋ a nʋ: Ka Kea ‑nɩa 'e dɩ ‑wee'‑ "klein "jrukpɔ' 'je ɛɛ' juoo sʋn nʋ ‑ɛ?
Ɛmɛ tɛɛan o 'ee ka ɛ 'je ɛɛ' juoo sʋn nʋ ‑ɛ?
12 'Kamɔ dɛsaʋnʋʋ doun" 'di flɔn i,
ʋʋa' "wliiɛ ɛ 'kpaa "kpei jeejee.
13 ‑Mɛ 'ma pɛe 'ɩn wɔɔa' 'de ɛ,
dɛ foo" 'ma nʋ
14 ‑sɔn 'oo ‑sɔn, blati a 'daʋn 'ɛ
‑klae" pɛɛn 'oo ‑klae" pɛɛn 'ma 'jeɛ kuɩ wɔn 'Ma 'jeɛ kuɩ wɔn.
15 ‑Bo 'ɩn 'na 'ɩn ke dɛsaʋnʋʋ 'je wlu due' 'ble 'de ɛ,
‑mɛ 'ɩn sie ɛɛ' "nynuu 'mɛ 'bo ‑jesee.
16 'Ɩn naa ɛɛ' dɛ tu 'a tɔ' i 'mɛ ‑nana
‑wɛe 'ɩn ‑kwlɩ" 'je i flɔn, 'kaa ɛ nɩɛ 'kle 'de 'ʋn "jri 'de.
17 Mamaʋ 'sʋ 'ɩn je 'de Kea o ‑gbu" ‑sɔn pa
‑wɛe 'ɩn je ‑ta dɛsaʋnʋʋ 'a 'kmʋ a 'bɔɔa 'de i 'wɔn.
18 Kɩɩn tɔ' ‑o, ɛ ‑teɛ' ʋʋpʋ‑ 'de ‑gbeesoai"
‑wɛe ʋʋ 'je i bla 'de ʋʋ 'je i sɔn ‑too"‑
19 'De "jriɛtɛ‑ due' "i 'sʋ ʋʋ 'kpa dɛ ‑gbaou",
ʋʋ ‑kwɛ', ʋʋ 'wlʋɛ ‑jei", faʋn 'a 'sʋ ‑sʋpʋ i.
20 Ka "nyiɔ sɔn i a "maea ja ɔ jaa' o ɛ,
'oo Nyɔsoa,‑ɩn ‑sʋan 'ʋn 'sʋ ʋʋ ‑wee'‑ sɔn i.
21 ‑Ta 'ma pɛe mɩ o ‑wee'‑ "kaea' "jrii i ɛ, ka 'sɩn a nma dɛ 'ʋn
22 ‑mɛ ɩn 'bo, 'ɩn se tɔ' 'di nɩ‑
ka nmi nɩa 'ka 'ɩn nɩ 'de ɛ "jri 'de.
23 'Kaa 'ɩn nɩɛ o ɛ ‑pʋn" jeejee. Ɛ kpʋn ɛ 'ma diian sʋn i.
24 Ɛɛ muɛ 'ʋn ‑je o poa' ka ɛmɛ nɩa "i ɛ,
'de ɛ 'je 'ʋn kɛɛma' ju 'ʋn nʋ.
25 Nyɔ jrɔ' 'mɔ 'ble 'de jaʋn 'di ‑bo ɛ se ɛmɛ nɩɛ?
'De 'blʋa "kpei ‑ta, ɛmɛ ‑nɩ 'ma 'mɩ e pɛe‑
26 'Ma nyiɔ ku ke 'ma pɛe 'bɛɛ i 'je pau" pa
'kaa Kea mɛ ‑ɛɛ mu 'ma ‑kliosou" nɩa' 'de 'ʋn pɛe o,
‑ɛɛ mu 'ma ‑nɩ 'kɛn nɩa'.
27 Nyʋ ‑ʋʋ tɛan o ‑mʋ ‑wee'‑ a 'mɛɛ.
Nyʋ ‑ʋʋ ‑sɛ sʋn 'kwa ‑wee'‑ a sɔn i.
28 'Mɔ ɛ, 'ma ɛɛ' ‑pʋn" 'kpaa mɛ ‑nɩ 'ma ‑pɔia".
'De nyɔ 'blei, Tʋ "bo, ɛmɛ 'mɔ tba ‑gbɔo 'di
‑wɛe 'ɩn 'je ɛɛ' nʋʋdɩ ‑wee'‑ 'a kɛ' i 'jrɛɛ‑.